الدنيا تاتعطينا بزاف ديال الحوايج منهم الزوينين ومنهم الخايبين و بصراحة تانتعلمو بزاف منهم كوماكانوش هما تاراحنا عمرنا ما نتعلمو و تاراحنا ديما غالطين نفس الغلطة اللي غلطناها قبل. خاصنا ديما نعطيو لراسنا فرصة اخرى و خصوصا لقلبنا اللي تايتعدب بزاف بسبب الشخص الغير المناسب .وخا تانعياو نقولو ما عنداش لقلب،قلبي حجرة مي تانطيحو فواحد الشخص اللي بسبابو تاتعرف باللي كنتي غير تاتكدب على راسك و تاتوهمو بشي حاجة ماكايناش و تاتبقى تعاودها معا راسك كل ساعة باش تيقها،باش تحس غير بشوية ديال الراحة الوهمية و بسباب ديك الشخص تاتعرف بالي راك انسان و عندك أحاسيس و تاتبقى تحس بالضربات ديال قلبك منين تاتفكرو تاتحس بواحد الإحساس كنتي قاتلو من لداخل ديالك بسباب حتاش ماعرفتيش تختار اللي تايبغيك . تاتبقا تحسب السوايع فوقاش يدوزو غير باش يجي لغد ليه باش تشوفو واخا ماتدويوش مهم هي العين تشبع منو و خا هدي ماكايناش لأنها عمرها غادي تشبع من اللي تاتبغي تشوفو .
تاتكونو تاتدويو عادي اولا صداقةعادية أو مقربة تا تاتكتاشف باللي راك تانبغيه و ماتقدرش تبعد عليه مي ديما تانخافو من ردود الفعل ديا الطرف التاني و تانخافو يكون الجواب ب تاأنا راكي بحال ختي و ربي اللي عالم . تانبغيو نعبرو على المشاعر ديالنا مي تانخافو نخسرو اللي تانبغيو . تاتبغي غير تشيد فاليد ديال اللي تاتبغي و تواجهو هاد الدنيا مي تاتخاف يمشي و يخليك فنص الطريق .
عرفتي باش تعرف شكون تاتبغي هو اللي طاح ليك دابا فدماغك و نتا تاتقراو هادشي ،هو اللي منين تاتكون تاتفرج فشي فيلم رومانسي تاتفكرو ،وهو النيت اللي منين تاتكون تاتصنت لشي أغنية رومانسية حزينة تايجيك فبالك، وأهم حاجة هو اللي تاتلقاه فجنبك فلحلوّة و المرة .